معظم الناس بتعبّي هوا «على النظر» أو بتحكي لعامل الكازية «حطلي 32». بس ضغط الكوشوك الصحيح بيختلف من سيارة لسيارة، والغلط فيه بيكلّفك كوشوك وبنزين وأمان.
وين بلاقي ضغط الهواء الصحيح لسيارتي؟
- ملصق على عمود باب السائق أو على حافة الباب.
- جوّا غطاء تعبئة البنزين ببعض السيارات.
- كتيّب السيارة.
الملصق غالباً بيعطيك رقم للإطارات الأمامية ورقم للخلفية، وأحياناً رقم مختلف لما السيارة تكون محمّلة. بأغلب سيارات الركوب الرقم بين 30 و35 PSI، بس اعتمد رقم سيارتك مش رقم عام.
شو بيصير لما يكون الضغط قليل؟
- الإطار بيتآكل من الطرفين وبيخلص أسرع.
- صرف البنزين بيزيد لأنه مقاومة الدوران بتكبر.
- الإطار بيسخن زيادة، وهذا أخطر إشي على السرعات العالية.
- الستيرنج بيثقل والسيارة بتصير أقل ثبات بالمنعطفات.
- الجنط بيصير معرّض للضرب بالحفر والمطبات.
وشو بيصير لما يكون الضغط زايد؟
- الإطار بيتآكل من النص.
- مساحة التلامس مع الشارع بتقل، فالتماسك والفرملة بيضعفوا، خصوصاً على المطر.
- السيارة بتصير قاسية وبتحس بكل مطب.
هل بنقّص الضغط بالصيف وبزيده بالشتا؟
هاي من أكثر المعلومات الغلط انتشاراً. الجواب: لا، التزم برقم الشركة الصانعة صيف وشتا.
صحيح إنه الضغط بيرتفع لما الإطار يسخن، بس الرقم الموصى فيه محسوب على هالأساس. المهم إنك تفحص وتعبّي والإطارات باردة: يعني السيارة واقفة من ساعتين أو ثلاث، أو ممشّية مسافة قصيرة جداً.
إذا نقّصت الضغط بالصيف، الإطار بينثني أكثر وبيسخن أكثر، يعني بتزيد الخطر بدل ما تقلله.
وبالشتا، الضغط بينزل لحاله مع البرد: تقريباً 1 PSI مع كل 5 أو 6 درجات. فأول ما يبرد الجو، افحص الضغط وزيده للرقم الصحيح. التفاصيل بمقال تجهيز الكوشوك للشتا.
كيف تفحص ضغط الكوشوك صح؟
- افحص والإطارات باردة.
- استخدم ساعة ضغط موثوقة، وما تعتمد على شكل الإطار.
- افحص الأربعة والاحتياطي.
- رجّع أغطية البلفات، لأنها بتحمي البلف من الغبرة والتسريب.
- كرر الفحص مرة بالشهر وقبل السفر.
إطار واحد بينقص أكثر من الباقي؟
كل الإطارات بتخسر شوية ضغط مع الوقت، وهذا طبيعي. بس إذا إطار واحد بينقص أسرع من الباقي، في تسريب: مسمار صغير، بلف تالف، أو جنط معوّج. شوف مقال البنشر والتسريب البطيء.
بدك الضغط يثبت أطول؟
تعبئة النيتروجين بتخلي الضغط يثبت لفترة أطول ويتأثر أقل بالحرارة. مش بديل عن الفحص الشهري، بس بتريّحك بين الفحص والثاني.
أسئلة متكررة
كم ضغط الهواء المناسب لإطارات السيارة؟
هل لازم أنقّص ضغط الكوشوك بالصيف؟
كل قديش لازم أفحص ضغط الإطارات؟
هل الرقم المكتوب على جنب الإطار هو الضغط المطلوب؟
بدك سعر أو استشارة؟
ابعتلنا مقاس الكوشوك أو نوع سيارتك على واتساب، ومنرد عليك بالسعر والمتوفر عنا. أو زورنا بالمحل على شارع اليرموك.
